ខេត្តបាត់ដំបង៖ នៅព្រឹកថ្ងៃទី៣ ខែមេសា ឆ្នាំ២០២៥ នៅទីបញ្ជាការកងពលតូចថ្មើរជើងលេខ៥២ បានទទួលបដិសណ្ឋារកិច្ចដំណើរអញ្ជើញចុះសាកសួរសុខទុក្ខរបស់រដ្ឋបាលខេត្តបាត់ដំបង ដឹកនាំដោយ ឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង ដែលបានដឹកនាំប្រតិភូខេត្ត អញ្ជើញចុះសំណេះសំណាលសួរសុខទុក្ខ កងកម្លាំងប្រដាប់អាវុធ ទិសទី៣ យោធភូមិភាគទី៥ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ នៅទីបញ្ជាការកងពលតូចថ្មើរជើងលេខ៥២ ស្ថិតនៅភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង។
ឯកឧត្តម សុខ លូ បានកោតសរសើរ និងវាយតម្លៃខ្ពស់ ចំពោះថ្នាក់ដឹកនាំ នាយទាហាន នាយទាហានរង ពលទាហាន កងពលតូចថ្មើរជើងលេខ៥២ទាំងអស់ ដែលកន្លងមកបានខិតខំប្រឹងប្រែងអនុវត្តនូវតួនាទីភារកិច្ច អស់ពីកម្លាំងកាយចិត្ត ក្នុងកិច្ចការពារបូរណភាពទឹកដី ក៏ដូចជារួមចំណែក ការពារសន្តិសុខសណ្ដាប់ធ្នាប់ ជូនដល់ប្រជាពលរដ្ឋបានយ៉ាងល្អប្រសើរផងដែរ ធ្វើឲ្យប្រជាពលរដ្ឋមានភាពកក់ក្តៅ ក្នុងមុខរបរចិញ្ចឹមជីវិត ក៏ដូចជាធ្វើឲ្យពួកគាត់កាន់តែមានជំនឿជឿជាក់មកលើការដឹកនាំ របស់រាជរដ្ឋាភិបាលយើងមួយកម្រិតថែមទៀត។
ក្នុងឱកាសអញ្ជើញចុះសួរសុខទុក្ខនោះដែរ ឯកឧត្តម អភិបាល នៃគណៈអភិបាលខេត្តបាត់ដំបង បានលើកកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះការចូលរួមយ៉ាងសកម្មរបស់ កងកងកម្លាំងប្រដាប់អាវុធ និងស្ថាប័នពាក់ព័ន្ធ ដែលបានរួមគ្នាការពារទប់ស្កាត់បទល្មើសនេសាទខុសច្បាប់ រួមគ្នាថែរក្សាសម្បត្តិធម្មជាតិដ៏មានតម្លៃលើផ្ទៃបឹងទន្លេសាប ឱ្យបានជោគជ័យ។
ជាចុងបញ្ចប់នៃការចុះសួរសុខទុក្ខនេះដែរ ឯកឧត្តម អភិបាល នៃគណៈអភិបាលខេត្តបាត់ដំបង បាននាំយកនូវអំណោយ របស់រដ្ឋបាលខេត្តផ្ដល់ជូនកងកម្លាំង កងពលតូចថ្មើរជើងលេខ៥២ រួមមាន : ស្រាបៀ ចំនួន ៣០កេស ទឹកសុទ្ធ ចំនួន ៥០កេស នំអន្សមជ្រូក ចេក ចំនួន ១ស្លឹក សាច់ជ្រូកស្រស់ ចំនួន ៦០គីឡូក្រាម បន្លែស្រស់ ចំនួន ៥០គីឡូក្រាម និង ថវិកា ចំនួន ៦.០០០.០០០រៀល៕ អរគុណសន្ដិភាព
